साउन १२, कास्की
गण्डकी प्रदेशका अर्थमन्त्री रामजी प्रसाद बराल (जीवन)ले कास्कीको पोखरामहानगरपाकिा वडा नं. २१ मा पर्ने दम्सादीको पहिरो रोकथामको लागि आवश्यक पहल गर्ने बताउनुभएको छ ।
दम्सादीको पहिरोले ६५ घर परिवारको बस्ती सहित, झोलुङगे पुल समेत उच्च जोखिममा परेपछि स्थानियले त्यसको रोकथामको लागि पहल गरिदिन अर्थमन्त्री बराल समक्ष अनुरोध गरेका थिए ।
दम्सादीको दुई ठाँउमा गएको पहिरोको स्थलगत अवलोकन गर्दै मन्त्री बरालले सम्बन्धित निकायसंगको सहकार्यमा प्राविधिकको राय सल्लाह अनुसार पहिरो नियन्त्रणमा लागि पर्ने बताउनुभएको हो ।
मन्त्री बरालले बस्ती संरक्षणको नाममा करोडौं लगानी गर्नु भन्दा बस्तीलाई उचित ढंगले व्यबस्थापन गर्ने विषयमा समेत छलफल हुनुपर्ने भनाई राख्नुभयो ।
पोखरामहानगरपालिकाको वडा नं. १७ र २१ जोड्ने झोलुङगे पुल भएको स्थल भन्दा करिब एक सय मिटर टाडाको दुरीमा ठुलो पहिरो गएको छ भने दुई ठुला पहिरो करिब एक सय मिटरको दुरीमा गएको स्थानिय नवराज आचार्यले जानकारी दिनुभयो ।
स्थानिय श्रीराम सुवेदीले गत असार पहिलोे सातामा गएको पहिरोको कारण गाउँ बस्ती नै जोखिममा परेको भन्दै समयमै यसको समाधान खोजिनुपर्नेमा जोड दिनुभएको छ ।
