शहरमा भन्दा ग्रामिण क्षेत्रमा कोरोना संक्रमणको जोखिम बढि

unnamed

जेठ ११, कास्की

शहरि क्षेत्रमा भन्दा ग्रामिण भेगमा कोरोना संक्रमण भुसको आगो झैँ बढ्दै गएको भन्दै जनस्वास्थ्य विदहरुले चिन्ता व्यक्त गरेका छन् ।

गण्डकी प्रदेशका स्वास्थ्य निर्देशक डा. बिनोदबिन्दु शर्माका अनुसार सहरमा कडा निषेधाज्ञाले संक्रमण ‘जाम’ भएपनि गाउँमा भने भुसको आगो फैलिएजसरी तिब्र भएको छ । ‘अझै दुईहप्ता कडा लकडाउन गर्ने हो भने शहरमा नियन्त्रण हुन्छ । सहरमा नियन्त्रणमा हुनु भनेको चेन ब्रेक हुनु हो,’ शर्माले भन्नुभयो ‘तर गाउँमा चेनब्रेक हुन नसकेको हो ।’ गाउँमा हिडडुलमा हल्का हुँदा यो अवस्था आएको उहाले बताउनुभयो ।

‘शर्माका अनुसार शहरका मान्छे कोरोनाप्रति केहि सचेत भएपनि गाउँमा भीडभाडमा छैनौ भन्ने सोँचेर ढुक्क भैदिँदा समस्या बढेको हो । सहरबाट गाउँ गएका आफन्तहरुबाट नै गाउँमा संक्रमण फैलिएको उहाको अनुमान रहेको छ ।
यसैबिच
बागलुङ जिल्लाको बागलुङ नगरपालिकामा रहेका १ देखि ४ सम्मका वडा बाहेक बाँकी ५ देखि १४ सम्मका वडा गरि दशवटा वडा ग्रामिण भेग रहेपनि सोहि क्षेत्रमा कोरोनासंक्रमितहरुमा वृद्धि भएको पाईएको छ ।

नगरपालिकाका प्रमुख प्रशासकीय अधिकृत जीवन ज्ञवालीका अनुसार अहिले नगरपालिकाभित्र ३ सय भन्दा बढी सक्रिय संक्रमित छन् । ती मध्ये १५० जना जना मात्र सहरी क्षेत्रका वडा (१ देखि ४ सम्म) छन् । बाँकी सबै ग्रामिण क्षेत्रका वडाका बासिन्दा हुन ।

ज्ञवालीका अनुसार ‘गाउँमा संक्रमणले डरलाग्दो अवस्था निम्त्याएको छ ।’ वडाको संख्याको हिसाबले मात्र सहरको भन्दा बढी भएपनि जनघनत्व गाउँमा निकै नै कम भएको उहाले बताउनुभयो ।

‘गाउँमा मास्क पनि नलगाउने, आफ्नै इष्टमित्र हुन भनेर आउजाउमा वेवास्ता गरिएको छ,’ उहाले भन्नुभयो, ‘इष्टमित्रको त्यही आउजाउ नै अहिले गाउँमा कोरोना फैलाउने माध्यम बनेको छ ।’ सहरको र गाउँको जनघनत्वको आकारका विश्लेषण गर्दा पनि आधा बढी संक्रमण ग्रामिण क्षेत्रमा हुनु डरलाग्दो भएको उहाले बताउनुभयो ।

उता स्याङजाको पुतलीबजार नगरपालिकाको अवस्था पनि त्यस्तै रहेको छ । पुतलीबजारका प्रमुख प्रशासकीय अधिकृत पुरुषोत्तम शर्माका अनुसार नगरपालिकाका १४ वटा वडा मध्ये तीनवटा (१, ३ र १३) को तुलनामा ग्रामिण क्षेत्रका ११ वटा वडामा भएका संक्रमितको संख्या बढी रहेको उहाले बताउनुभयो ।

अहिले गाउँमा कन्ट्याक्ट ट्रेसिङ पनि नहुनु, गाउँले आफै बिरामी भए भन्दै परीक्षण गर्न आए मात्र नमूना संकलन गरिनुले पनि तथ्याङ्कमा आएका भन्दा धेरै गाउँलेहरुमा संक्रमण भैसकेको हुनसक्ने अधिकृत शर्माले बताउनुभयो ।