चैत ९, एजेन्सी,
अमेरिकी इलेक्ट्रिक कार निर्माता कम्पनी टेस्लाका प्रमुख कार्यकारी अधिकृत एलन मस्कले आरोप प्रमाणित भए कम्पनी नै बन्द गरिदिने बताउनुभएको छ । चीनभित्र जासुसी गर्न टेस्ला कार प्रयोग भएको आरोप लागिरहँदा मस्कले यस्तो बताउनुभएको हो । तर, आरोप लगाउँदै गर्दा पुष्टि गर्ने प्रमाण पनि प्रस्तुत गर्न उनले चुनौती दिनुभएको छ ।
चिनियाँ सेनाले गोपनीयतालाई कारण देखाउँदै टेस्ला कम्पनीका कार प्रयोगमा प्रतिबन्ध लगाएको खबर सार्वजनिक भएको थियो । बेइजिङका सुरक्षा अधिकारीहरूले टेस्ला कारमा लगाइएको क्यामेराले तथ्यांक चोरी गर्नसक्ने आशंका जनाएका थिए । अमेरिकापछि टेस्लाको सबैभन्दा ठूलो बजार नै चीन रहेको छ ।
