प्रतिनिधि सभा विघटनसम्बन्धी मुद्दाको सुनुवाइ आउँदो २३ गतेसम्मका लागि स्थगित

sarbochha

जेठ १८, काठमाण्डौ

दुई जना न्यायाधीशले संवैधानिक इजलास छाडेपछि प्रतिनिधि सभा विघटनसम्बन्धी मुद्दाको सुनुवाइ आउँदो २३ गतेसम्मका लागि स्थगित भएको छ । न्यायाधीशद्वय दीपककुमार कार्की र आनन्दमोहन भट्टराईले इजलासको यही संरचनाबाट अगाडि बढ्दा न्यायिक निष्पक्षता कायम हुनेमा ढुक्क हुन नसकिएको भन्दै इजलास छाडेपछि प्रधानन्यायाधीश चोलेन्द्र शमशेर जबराले २३ गतेसम्मका लागि सुनुवाइ स्थगित गर्नुभएको हो ।
मंगलबार(आज)को संवैधानिक इजलासमा आफ्नो राय पेस गर्दै न्यायाधीशद्वय कार्की र भट्टराईले प्रधानन्यायाधीशले आवश्यक ठानेको खण्डमा आफूहरू बस्न तयार रहेको पनि बताएका छन् । यसअघि संवैधानिक इजलासमा रहेका न्यायाधीश बमकुमार श्रेष्ठ र तेजबहादुर केसीमाथि रिट निवेदक पक्षका वकिलहरूले प्रश्न उठाएका थिए । नेकपा दर्ता बदरसम्बन्धी मुद्दा हेरेकाले उनीहरू इजलासमा बस्न नमिल्ने भन्दै उनीहरूले विरोध गरेपछि रिटको सैद्धान्तिक विषयमै छलफल हुन सकेको थिएन ।

आज पुरानै संवैधानिक इजलास गठन गरेपछि न्यायाधीशहरू कार्की र भट्टराईले आफ्नो रायसहित इजलास छाडेका हुन् । यस्तै न्यायाधीश केसी र श्रेष्ठले पनि इजलासमा छुट्टाछुट्टै राय पेस गर्दै पहिलेको र अहिलेको दुई मुद्दाको कुनै सम्बन्ध नहरेकाले आफूहरू इजलासमा बस्न कुनै बाधा नरहेको उल्लेख गरेका थिए । त्यसपछि २३ गतेसम्मका लागि सुनुवाइ स्थगित गर्दै प्रधानन्यायाधीश जबराले अर्को इजलास गठन गर्ने जानकारी दिनुभएको छ ।