कास्कीका मुख्य पाँच दलद्वारा प्रतिनिधिसभा विघटन विरुद्ध एकजुट हुन आव्हान

kaski

जेठ १२, कास्की,

राष्ट्रपति र प्रधानमन्त्रीले प्रतिनिधिसभा विघटन गरेर प्रतिगमनकारी कार्य गरेको आरोप लगाउँदै कास्कीका क्रियाशील पाँच राजनीतिक दलले त्यस कदमविरुद्ध एकजुट हुन आव्हान गरेका छन् ।

दलले नेपाली जनताको लामो आन्दोलन, संघर्ष र बलिदानबाट स्थापित संविधान, संघीय लोकतान्त्रिक गणतन्त्र, समावेशी लोकतन्त्र एवं नेपालको सर्वाेपरी राष्ट्रिय हितको रक्षाका लागि दृढतापूर्वक अगाडि बढ्न आव्हान गरेका हुन् ।

कास्की काँग्रेसका सभापति कृष्ण केसी, नेकपा (माओवादी केन्द्र) कास्कीका सचिव बखानसिंह गुरुङ, नेकपा (एमाले) कास्कीका अध्यक्ष धनराज आचार्य, जनता समाजवादी पार्टी (जसपा) कास्कीका अध्यक्ष गिरिप्रसाद गुरुङ र राष्ट्रिय जनमोर्चा (राजमो) कास्कीका कोषाध्यक्ष विष्णु पुरीले मंगलबार संयुक्त विज्ञप्ति प्रकाशित गरी त्यस्तो आग्रह गरेका हुन् ।

विज्ञप्तिमा राष्ट्रपति विद्यादेवी भण्डारीबाट संवैधानिक दायित्व निर्वाह नभएको र उल्टै प्रधानमन्त्री केपी शर्मा ओलीसँगको मिलेमतोमा वदनियतपूर्ण तरिकाले प्रतिनिधि सभा विघटन गरी नेपालको संविधान र लोकतन्त्रमाथि नै प्रहार गरिएको उल्लेख छ ।