मनसुन फेरि सक्रिय हुँदै केही स्थानमा लगातार वर्षा

mausam

साउन ३०, कास्की,

मनसुनी गतिविधि पुनः सक्रिय भएर अबको केही दिन देशभर बदली तथा वर्षाको क्रम बढ्ने देखिएको जल तथा मौसम पूर्वानुमान महाशाखाले जनाएको छ ।

मौसमविद वरुण पौडेलका अनुसार भारतीय क्षेत्रमा रहेको मनसुनी न्यून चापिय क्षेत्र नेपालको तराई हुँदै माथिल्लो क्षेत्रमा सर्ने क्रममा देखिएको छ ।

मौसमविद पौडेलले भन्नुभयो, ‘केही कमजोर रहेको मनसुनी गतिविधि सक्रिय हुने क्रममा छ । अहिले पूर्व र पश्चिमको तराई क्षेत्रमा वर्षा भइरहेको छ । दिउँसो तिर मनसुनी गतिविधि सक्रिय पार्ने प्रणाली माथिल्लो क्षेत्रमा पनि सर्ने देखिन्छ ।’

अबको केही दिन देशभर नै सामान्यदेखि पूर्ण बदली भई धेरै स्थानमा हल्कादेखि मध्यम र केही स्थानमा भारी तथा धेरै भारी वर्षाको सम्भावना रहेको उनले बताए ।

अबको हप्ता देशभर मनसुन सक्रिय हुने भएकाले केही स्थानमा लगातार वर्षा अर्थात झरी पर्ने सम्भावना रहेकोले सतर्कता अपनाउन मौसमविदको सुझाव छ ।