बैशाख ८, कास्की,
जिल्ला प्रशासन कार्यलय कास्कीले कोरोना संक्रमणको जोखिम बढेको भन्दै बैशाख मसान्तसम्म मानिसको भीडभाड हुने सबै स्थानहरु बन्द गर्न आदेश जारी गरेको छ ।
प्रमुख जिल्ला अधिकारी थानेश्वर गौतमद्धारा जारी १७ बुंदे विज्ञप्तिमा पोखराका विद्यालय, सिनेमाहल, डान्सबार, डिस्को, दोहोरी, दर्शक सहितको विभिन्न खेलकुदका कार्यक्रम, सभा, समारोह, हाटबजार पूर्ण रुपमा बन्द गर्नुपर्ने उल्लेख गरिएको छ । यस्तै सार्वजनिक यातायात, आन्तरिक हवाई उडान, होटल रेष्टुरेण्ट लगायतमा स्वास्थ्य मन्त्रालयले तय गरेको सम्पूर्ण स्वास्थ्य मापदण्ड पालना गरेर मात्र सञ्चालन गर्न भनिएको छ ।
जिल्ला प्रशासनले उल्लेख गरेका नियमहरुको पालना नगरेमा, संक्रामक रोग ऐन २०२० र स्थानिय प्रशासन ऐन २०२८ अनुसार जोकोहिलाई पनि कारबाही गरिने विज्ञप्तिमा जनाईएको छ ।
आदेशमा बिहान ८ बजेदेखी बेलुकी ८ बजेसम्म होटल रेष्टुरेण्टले दुई मिटरको दुरी कायम गरि अनिवार्य मास्क र सेनिटाइटजरको व्यबस्थापन गर्नुपर्ने उल्लेख गरिएको छ ।
रेष्टुरेन्टदेखि सबै सार्वजनिक स्थान, मठ, मन्दिर, मस्जिद, गुम्बा, चर्चलगायतका धार्मिक स्थलमा जनस्वास्थ्यका मापदण्ड पालना गर्ने गरी २०७८ वैशाख मसान्तसम्म नित्यपूजा, ध्यान र प्रार्थना मात्र गर्न गराउन भनिएको छ ।
त्यस्तै प्रयोग गरिएका माक्स जथाभावि नफाल्न, घरबाट निस्कँदा स्वास्थ्य मापदण्ड पालना गरेर मात्र निस्कन, २५ जना भन्दा धेरै भेला हुने गरे सभासमारोह नगर्न, सार्वजनिक स्थलहरुमा दुई व्यक्तिबिच २ मिटरको दुरि कायम गर्न पनि भनिएको छ ।
