चैत २७, पोखरा,
कास्कीको पोखरा सहित गण्डकी प्रदेशका लगभग सबै जिल्लाहरुमा आज विहानै देखि वायू प्रदुषणमा सामान्य सुधार आएको छ । पोखराको वायु प्रदूषण अहिले अति हानिकारक अवस्थाबाट अस्वस्थ अवस्थामा झरेको वातावरण विभागले जानकारी दिएको हो । केही दिनअघि नेपालको वायु प्रदूषण मापन गर्ने एक्यूआई ४ सय ७० सम्म पुगेको थियो तर अहिले सुधार भएर १५० भन्दा तल झरेको विभागको भनाई छ । बिहिबार नेपालको एक्यूआई दुई सयभन्दा माथि मापन गरिएको थियो ।
वायु प्रदूषण कम हुँदै गएको तर अस्वस्थ अवस्था अझै कायम भएकाले विशेष सावधानी अपनाउन जनस्वास्थ्यविद्हरुले आग्रह गरेका छन् । ठूलो पानी नपर्दासम्म अझै केही दिन प्रदूषण कायमै रहने सम्भावना रहेको मौसम पूर्वानुमान महाशाखाले बताएको छ ।
आज साँझ पख गण्डकी प्रदेशका केहि पहाडी क्षेत्रमा हल्का पानी पर्ने सम्भावना रहेको मौसमविद् शान्ति कंडेलले जानकारि दिनुभयो । नेपालमा अहिले न्यूनचापीय मौसमी प्रणालीको विकास भएकोले अझै एक÷दुई दिन हल्का पानी पर्ने र आउँदो सोमवार पछि ठूलो पानी पर्ने सम्भावना रहेको मौसमविद कंडेलले बताउनुभयो ।
बङ्गालको खाडीबाट आएको न्यूनचापीय मौसमी प्रणालीका कारण गण्डकी प्रदेशको मौसम आंशिक रुपमा बद्ली भएको मौसमविदको भनाई छ । पोखरामा विहानै देखि घाम लागेपनि आकाशमा तुवाँलो भने अझै कायमै रहेको छ ।
